Saturday, July 24, 2010

... صباح الورد





صباح الورد يا دنيا بناديلك
يبعتر قلبى حنية بطول ليلك
صباح الخير و يا ايامى بندهلك
امانة ترحمى المخاليق ..و على مهلك

صباحك نور فى وسط الضلمة شقشقلى
صبح بيقولى راح ترتاح و حتروقلى
و قبل الشمس كان قمرى و ونّاسى
وليل مسهرش فيه رمشى . مهوش قاسى

صباح الفل يا بلدى و امتى تفوقى 
  و تغيرى و تتغيرى و تثورى فتروقى 
من همّ ناس باعوا و خلاص
و قالوا هيبنوا فى مجدك .. و هدّوا الاساس

و طفشّوا العاقلين كمان .. و صدّروهم للغيلان
ما هم كمان مستحملوش..يفقدوا فيكى الامان

يا بلدى اسمعى منى كلامى دا ليكى و عشانك
مفيش اصعب من الغربة. ترمينى عليها احزانك
دى بلدى تكون مكان ما قلبى يتصدّق
و عقلى يشتغل فيها و حلمى يتحقق

و انا  عارف الزمن لا خان و لا باع زمن طيب
بناسه و ناسى فوق راسى و مش حهرب
هعمرّ فيكى و هغيّر و اصلح اد ما هقدر
لعلّه يجى يوم ,,, اقولك فيه و من قلبى 

صباح السعد يا بلدى و عدلك نور
و نورك للبلاد عدّى و زوّد نور
و حكم العقل فى الفوضى عدل الميزان
و عدتى يا بلدى بناسك ست الزمان



2 comments:

Doaa said...

صباح الورد ... :D

gehad,93 said...

صباح الورد و الفل و الياسمين